Абдуллоҳ Абдуллоҳ ба Тоҷикистон сафар мекунад

Абдуллоҳ Абдуллоҳ, раиси Шӯрои олии мусолиҳаи миллии Афғонистон ба Тоҷикистон сафар мекунад. Дар ин бора Дафтари матбуоти Вазорати умури хориҷии Тоҷикистон рӯзи 18-уми декабр иттилоъ дод.

Дар хабар омадааст, ки рӯзи 16-уми декабр Сафири Тоҷикистон дар Афғонистон Саъдӣ Шарифӣ дар Кобул бо Абдуллоҳ Абдуллоҳ мулоқот кардааст. Дар ин сафар мавзуъи сафари дарпешистодаи раиси Шӯрои олии мусолиҳаи миллии Афғонистон ба Тоҷикистон ва масъалаҳои ҳамкорӣ миёни ду кишвар мавриди баррасӣ қарор гирифтааст.

Сафари қарибулвуқӯи Абдуллоҳ Абдуллоҳ ба Тоҷикистон дар ҳоле сурат мегирад, ки талошҳо барои даст ёфтани созиши сулҳ ва поёни ҷанги чиҳилсола дар Афғонистон, дар ин авохир афзоиш ёфтааст.

Тоҷикистон бо Афғонистон тақрибан 1400 километр марз дорад. Мақомоти Тоҷикистон борҳо эълон кардаанд, ки ҷонибдори ҳарчи зуд барқарор шудани сулҳ дар Афғонистон ҳастанд.

Манбаъ: ozodi.org

Назар бидиҳед

Роёнишонии шумо нашр намешавад.