Анҷоми замони имтиёз навбатпоиҳоро дар назди идораҳои муҳоҷират зиёд кардааст

Ба поён расидани мӯҳлати қарори президенти Русия дар мавриди додани имтиёз ба шаҳрвандони хориҷӣ дар шароити пандемия ва ҳушдори мақомоти рус ҷиҳати қонунӣ кардани ҳузур дар ин кишвар, рӯзҳои ахир навбатпоиҳои бузургро дар назди намояндагиҳои муҳоҷирати Русия ба бор овардааст. Рӯзи гузашта издиҳоми муҳоҷирон дар назди хадамоти муҳоҷирати “Сахарово”-и Маскав  боиси бесарусомонӣ шудааст. Корбарони Радиои Озодӣ бо фиристодани чандин навор нақл карданд, мақомдорони рус теъдоде аз муҳоҷиронро дар дохили бино ва садҳо нафари дигарро дар берун аз он нигоҳ доштанд. Ба гуфтаи онҳо, бар замми ин ки дар шароити пандемия муҳоҷирон фосилаи иҷтимоиро риоят намекунанд, дар талотуме, ки барои гирифтани патент ба амал омад, чандин зану марди тоҷик зери по монда ҷароҳат бардоштанд. Ахиран вазорати корҳои дохилии Русия барои қонунӣ кардани буду бош ба муҳоҷирони тоҷик то 30-юми июн мӯҳлат дод. Сафорати Тоҷикистон низ аз муҳоҷирон дархост кард, мунтазири анҷоми мӯҳлат нашуда, ҳуҷҷатҳоро ба расмият дароранд. Аз сӯи дигар, баргузории рейдҳои мақомоти ҳифзи ҳуқуқ муҳоҷиронро водор кардааст, барои гирифтани патент то 12 соат дар навбат истанд. 

Манбаъ: ozodi.org

Назар бидиҳед

Роёнишонии шумо нашр намешавад.