Раҳбарони “Агроинвестбонк” ва “Тоҷиксодиротбонк” аз мақомҳояшон барканор шуданд

Муродалӣ Алимардон, раиси “Агроинвестбонк” ва Тоҷиддин Пирзода, раҳбари “Тоҷиксодиротбонк” аз мақомҳояшон барканор шуданд ва ба ҷойи онҳо мудирони махсус таъйин карда шуданд.

Қарор аст мудирони махсус то таъин шудани мудирони барҳамдиҳанда бонкро идора кунанд. Мудирони барҳамдиҳанда, ки дар ниҳоят аз сӯи додгоҳ таъин хоҳанд шуд, амвол ва дороиҳои ин ду бонкро ба фурӯш гузошта, амонатҳои мардум ва пули саҳомони бонкро бозгардонанд.

Ҳамкнун бо қарори додгоҳ Фирӯз Ҷалолов, мудири барҳамдиҳандаи “Агроинвестбонк” ва Ҷамшед Абдураҳимов, мудири барҳамдиҳандаи “Агроинвестбонк” таъин карда шуданд.

Муҳлати барҳамдиҳии ин бонкҳо ду сол таъин шудааст, ҳарчанд додгоҳ метавонад, ин муҳлатро боз ҳам тамдид кунад. Аммо Тоҷиддин Пирзода, раиси “Тоҷиксодиротбонк” ахиран дар суҳбат бо Радиои Озодӣ гуфт, ҷараёни барҳамдиҳии “Тоҷиксодиротбонк” набояд зиёд тӯл кашад ва амонатҳои мардум дар муддати аз 6 моҳ то як сол бозпас дода хоҳанд шуд.

Иҷозатномаи фаъолияти “Тоҷиксодиротбонку” “Агроинвестбонк”-ро Бонки миллӣ 21-уми май бозхонд кард. Дар изҳороти Бонки миллӣ дар ин бобат гуфта шуд, фаъолияти ин ду бонк новобаста ба ёриҳои ҳукумат мӯътадил нашуд.

Ин ду бонки як замон азим ва ба истилоҳ низомсоз соли 2015 дучори буҳрон гашта дар пардохти амонатҳои мардум оҷиз монданд. Ҳукумати Тоҷикистон соли 2016 барои наҷоти ин ду бонкҳои дучори мушкил беш аз се миллиард сомонӣ қарз дод, аммо мушкили ин бонкҳо ҳал нашуданд.

 

Манбаъ: ozodi.org

Назар бидиҳед

Роёнишонии шумо нашр намешавад.